بسم اللہ پڑھنے پر والد کی مغفرت کا واقعہ
حضرت امام رازی رحمۃ اللہ لکھتے ہیں کہ ایک دفعہ حضرت عیسی علی نبینا علیہ الصلوۃ والسلام کا ایک قبر سے گزر ہوا ۔۔آپ نے بطور کشف دیکھا کہ عذاب کے فرشتے میت کو عذاب دے رہے ہیں ۔آپ آگے تشریف لے گئے ‘ اپنے کام سے فارغ ہو کر جب دوبارہ آپ کا گزر اس قبر سے ہوا۔ تو آپ نے دیکھا کہ اس قبر پر رحمت کے فرشتے جمع ہیں۔ اور ان کے پاس نور کے طبق ہیں ۔آپ کو اس پر تعجب ہوا ۔آپ نے نماز پڑھی اور اس واقعے کی حقیقت معلوم کرنے کے لیے اللہ سے دعا کی اللہ تعالی نے وحی بھیجی فرمایا! اے عیسی ! یہ بندہ گنہگار تھا اور جب سے مرا تھا عذاب میں گرفتار تھا۔ یہ مرتے وقت اپنی بیوی چھوڑ گیا تھا ۔جو کہ حاملہ تھی ۔اس عورت نے اس کے بیٹے کو جنم دیا ۔اور اس کی پرورش کی یہاں تک کہ وہ پڑھنے کے قابل ہو گیا ۔اس عورت نے اس بچے کو مکتب میں بھیجا ۔استاد نے اسے بسم اللہ الرحمن الرحیم پڑھائی ۔بس مجھے اپنے بندے سے حیا آئی کہ میں اس کو آگ کا عذاب دوں زمین کے اندر اور اس کا بیٹا میرا نام لیتا ہے زمین کے اوپر۔